ଭୁବନେଶ୍ଵର-ଦୀର୍ଘ ୨୪ ବର୍ଷ ପରେ ଓଡିଶାକୁ ମିଳିଛି ନୂତନ ମୁଖ୍ୟମନ୍ତ୍ରୀ । ରାଜ୍ୟରେ ବିଜେଡିର ଗଡ ଭାଙ୍ଗି ନୂତନ ସରକାର ଗଠନ କରିବାକୁ ଯାଉଥିବା ବିଜେପି ମୋହନ ଚରଣ ମାଝୀଙ୍କୁ ଓଡିଶାର ନୂଆ ମୁଖ୍ୟମନ୍ତ୍ରୀ ଭାବରେ ଘୋଷଣା କରିଛି । ସୂଚନାଯୋଗ୍ୟ ଯେ, ୨୦୨୪ ଓଡିଶା ବିଧାନସଭା ନିର୍ବାଚନରେ ବିଜେପି ନେତା ମୋହନ ଚରଣ ମାଝୀ ୧୧,୫୭୭ଟି ଭୋଟରେ ବିଜୁ ଜନତା ଦଳର ମୀନା ମଞ୍ଜୀଙ୍କୁ ପରାସ୍ତ କରି କେନ୍ଦୁଝର ବିଧାନସଭା ଆସନ ଜିତିଛନ୍ତି । ୫୨ ବର୍ଷିୟ ମୋହନ ୪ଥର ବିଧାୟକ ହୋଇଛନ୍ତି । ସେ ୨୦୦୦ ରୁ ୨୦୦୯ ମଧ୍ୟରେ ଦୁଇଥର କେନ୍ଦୁଝରର ପ୍ରତିନିଧିତ୍ୱ କରିଥିଲେ । ଏହା ପରେ ପୁଣି ଥରେ ମୋହନ ଚରଣ ମାଝୀ ୨୦୧୯ରେ ବିଜେପି ଟିକେଟରେ କେନ୍ଦୁଝରରୁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରି ଜିତିଥିଲେ । ମୋହନ ମାଝୀ ନିଜର ରାଜନୈତିକ ଜୀବନରେ ସବୁବେଳେ ସର୍ବାଙ୍ଗୀନ ସ୍ବାର୍ଥରେ ସ୍ବର ଉତ୍ତୋଳନ କରି ଆସିଛନ୍ତି । ବିରୋଧୀ ଦଳରେ ଥିବା ବେଳେ ଶାସକ ବିଜେଡି ଉପରେ ଅନେକ ପ୍ରଶ୍ନ ନେଇ ବର୍ଷିଛନ୍ତି ମୋହନ । ୪ ଥର କେନ୍ଦୁଝରରୁ ବିଧାୟକ ହୋଇଥିବା ମୋହନ ମାଝୀ ଚଳିତ ନିର୍ବାଚନରେ ବିଜେପି ଦଳ ଉପମୁଖ୍ୟ ସଚେତକ ମଧ୍ୟ ରହିଥିଲେ । ଜଣେ ଆଦିବାସୀ ଚେହେରା ଭାବରେ ଓଡିଶା ରାଜନୀତିରେ ବେଶ୍ ଆଦୃତ ମୋହନ । ସରସ୍ବତୀ ଶିଶୁ ମନ୍ଦିରରେ ଜଣେ ସାଧାରଣ ଗୁରୁଜୀ ଭାବରେ ଜୀବନ ଆରମ୍ଭ କରିଥିଲେ ମୋହନ । ପରେ ଓ୍ବାର୍ଡମେମ୍ବର ଓ ସରପଞ୍ଚ ଭାବରେ ମଧ୍ୟ ଲୋକଙ୍କ ପାଇଁ କାମ କରିଥିଲେ । ମୋହନ ଚରଣ ମାଝୀ ୬ ଜାନୁୟାରୀ ୧୯୭୨ରେ ଓଡ଼ିଶାର କେନ୍ଦୁଝରରେ ଜନ୍ମଗ୍ରହଣ କରିଥିଲେ। ଅନୁସୂଚିତ ଜନଜାତିରୁ ଆସି ଡକ୍ଟର ପ୍ରିୟଙ୍କା ମାରାଣ୍ଡିଙ୍କୁ ବିବାହ କରିଥିଲେ ମୋହନ । ୧୯୯୭ ରୁ ୨୦୦୦ ପର୍ଯ୍ୟନ୍ତ ଜଣେ ସରପଞ୍ଚରୁ ସେ ତାଙ୍କର ରାଜନୈତିକ କ୍ୟାରିଅର୍ ଆରମ୍ଭ କରିଥିଲେ । ଏହା ପରେ ସେ ୨୦୦୦ ମସିହାରେ ପ୍ରଥମ ଥର ପାଇଁ ବିଧାୟକ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରି ଜିତିଥିଲେ। ବିଜେପି ତାଙ୍କୁ ରାଜ୍ୟ ଆଦିବାସୀ ମୋର୍ଚ୍ଚାର ସଚିବ ପଦରେ ମଧ୍ୟ ନିଯୁକ୍ତ କରିଛି । ଏହା ବ୍ୟତୀତ ସେ ୨୦୦୫ ରୁ ୨୦୦୯ ପର୍ଯ୍ୟନ୍ତ ରାଜ୍ୟ ଏସ.ଟି ମୋର୍ଚ୍ଚାର ମୁଖ୍ୟ ଶାସନ ସଚିବ ଏବଂ ସରକାରୀ ଉପ ମୁଖ୍ୟ ସଚେତକ ମଧ୍ୟ ଥିଲେ ।
Advertisement
