ତାଳଚେର – ଅନୁଗୁଳ ଜିଲ୍ଲା ତାଳଚେର ସ୍ଥିତ ମହାନଦୀ କୋଲ ଫିଲଡ ଲିମିଟେଡ(MCL) ର ମ୍ୟାନେଜର ଏବଂ ସହକାରୀ ରାଜସ୍ଵ ନିରୀକ୍ଷକ(ARI) ୨୦ ହଜାର ଟଙ୍କା ଲାଞ୍ଚ ନେଉଥିବା ବେଳେ ସିବିଆଇ ହାତରେ ଧରା ପଡିଛନ୍ତି । ସ୍ଥାନୀୟ ଅଧିବାସୀଙ୍କୁ ଜମି ଅଧିଗ୍ରହଣ ବାବଦ କ୍ଷତିପୂରଣ ଟଙ୍କା ଦେବାକୁ ଲାଞ୍ଚ ନେଉଥିବା ବେଳେ ତାଳଚେର ମାଇନିଂ କର୍ପୋରେସନ ଲିମିଟେଡ୍ର ମ୍ୟାନେଜର ଏବଂ ସ୍ଥାନୀୟ ସହକାରୀ ଆସିଷ୍ଟାଣ୍ଟ ରେଭିନ୍ୟୁ ଇନ୍ସପେକ୍ଟରଙ୍କୁ ସିବିଆଇ ଗିରଫ କରି କୋର୍ଟ ଚାଲାଣ କରିଛି । ସୂଚନା ଅନୁସାରେ ତାଳଚେର ବ୍ରାହ୍ମଣୀବାହାଳର ମଦନ ସେଠୀଙ୍କର ଜମି କ୍ଷତିପୂରଣ ବାବଦରେ ୫ ଲକ୍ଷ ୭୮ ହଜାର ଟଙ୍କା ମିଳିବାର ଥିଲା । ଏହି ଟଙ୍କା ମଞ୍ଜୁର କରିଦେବା ପାଇଁ ଆସିଷ୍ଟାଣ୍ଟ ରେଭିନ୍ୟୁ ଇନ୍ସପେକ୍ଟର ଲୋକନାଥ ନାୟକ ଏବଂ ମ୍ୟାନେଜର ରବୀନ୍ଦ୍ର କୁମାର ପାଢୀ (Mines & I/C L&R Section) ୧ଲକ୍ଷ ଟଙ୍କା ଲାଞ୍ଚ ମାଗୁଥିବା ଅଭିଯୋଗ କରିଥିଲେ । ଆହୁରି ଅଭିଯୋଗ ହୋଇଥିଲା ଯେ ଉଭୟ ଅଭିଯୋଗକାରୀଙ୍କୁ ପ୍ରଥମ କିସ୍ତି ଭାବରେ ୭୦ ହଜାର ଟଙ୍କା ଲାଞ୍ଚ ଏବଂ କ୍ଷତିପୂରଣ ରିଲିଜ ପରେ ବକେୟା ରାଶି ଦେବାକୁ କହିଥିଲେ । ପରେ ୨୦ ହଜାର ଟଙ୍କା ପ୍ରଥମ କିସ୍ତି ଭାବରେ ଗ୍ରହଣ କରିବାକୁ ରାଜି ହୋଇଥିବା ଅଭିଯୋଗ ହୋଇଥିଲା । ଏହି ଅଭିଯୋଗ ଅନୁଯାୟୀ ସିବିଆଇ ଏକ ମାମଲା ରୁଜୁ କରିବା ସହ ମଙ୍ଗଳବାର ସନ୍ଧ୍ୟାରେ ୨୦ ହଜାର ଟଙ୍କା ଲାଞ୍ଚ ନେଉଥିବା ବେଳେ ଧରିଥିଲା । ଗିରଫ ଉଭୟ ଅଭିଯୁକ୍ତଙ୍କୁ ଆଜି ସିବିଆଇ ମାମଲାର ସ୍ୱତନ୍ତ୍ର ବିଚାରପତି ଭୁବନେଶ୍ୱରଙ୍କ ନିକଟରେ ହାଜର କରାଯାଇଥିଲା ।
Advertisement
