ଅନୁଗୁଳ – ବ୍ୟାଙ୍କକୁ ଜାଲ କାଗଜପତ୍ର ଦେଇ ୧୦ ଲକ୍ଷ ଟଙ୍କାର ଋଣ ନେବା ଅଭିଯୋଗରେ ଅନୁଗୁଳ ପୁଲିସ୍ ଆଜି ୩ ଜଣଙ୍କୁ ଗିରଫ କରିଛି । ଗିରଫ ଅଭିଯୁକ୍ତମାନେ ହେଲେ ତାଳଚେର ଥାନା ରେମୁଆଁର ହରିହର ବସନ୍ତରା , ତାଙ୍କ ପୁଅ ଦିଲ୍ଲୀପ ବସନ୍ତରା ଓ ବୋହୂ ସୁପ୍ରଭା ବସନ୍ତରା । ସୂଚନା ଅନୁସାରେ , ୨୦୧୭ ମସିହାରେ ଅଭିଯୁକ୍ତମାନେ ପ୍ରଥମେ ଏକ ବ୍ୟାଙ୍କରେ ଅସଲ କାଗଜପତ୍ର ଦାଖଲ କରି ଋଣ ଆଣିଥିଲେ । ପରେ ସେହି କାଗଜପତ୍ରର ସାର୍ଟିଫାଏଡ୍ କପି କରି ଜରାସିଂହା ସ୍ଥିତ ଏକ ବ୍ୟାଙ୍କରୁ ୧୦ ଲକ୍ଷ ଟଙ୍କା ଋଣ କରିଥିଲେ । ତେବେ ଋଣ ନେବା ପରେ ଆଉ ସୁଝିବାର ନା ଧରି ନଥିଲେ । ବ୍ୟାଙ୍କ କର୍ତ୍ତୃପକ୍ଷ ବାରମ୍ବାର ତାଗିଦ କଲେ ମଧ୍ୟ ସେମାନେ କର୍ଣ୍ଣପାତ କରୁ ନଥିଲେ । ସନ୍ଦେହ ହେବାରୁ ବ୍ୟାଙ୍କ ପକ୍ଷରୁ ଏ ନେଇ ଛାନଭିନ୍ କରିବା ପରେ ଅଭିଯୁକ୍ତ ମାନେ ଏଭକି ଉପାୟ ଅବଲମ୍ବନ କରିଥିବା ଜଣା ପଡ଼ିଥିଲା । ଏନେଇ ବ୍ୟାଙ୍କ ମ୍ୟାନେଜର ଅନୁଗୁଳ ଥାନାରେ ଲିଖିତ ଅଭିଯୋଗ କରିଥିଲେ । ପୁଲିସ୍ ଏ ନେଇ ଏକ ମାମଲା ରୁଜୁ କରି ତଦନ୍ତ ଚଳାଇଥିବା ବେଳେ ଆଜି ୩ ଅଭିଯୁକ୍ତଙ୍କୁ ଗିରଫ କରି କୋର୍ଟଚାଲାଣ କରିଥିବା ଜଣାପଡ଼ିଛି ।
Advertisement
