ନାଲକୋନଗର – ଅନୁଗୁଳ ଜିଲ୍ଲା ନାଲକୋନଗର ଥାନା ଅନ୍ତର୍ଗତ ବଳରାମପ୍ରସାଦ ଗଡ଼ସାହିର ଅବସରପ୍ରାପ୍ତ ଡ଼ାକ୍ତର ଅକ୍ଷୟ କୁମାର ସିଂଙ୍କ ଘରୁ ଟଙ୍କା , ସୁନା ଚୋରି ଘଟଣାର ପୋଲିସ ପର୍ଦ୍ଦାଫାଶ କରିଛି । ଡାକ୍ତରଙ୍କ ଘରେ ରୋଷେଇ କାମ କରୁଥିବା ଯୁବକକୁ ଚୋରି ଘଟଣାରେ ଗିରଫ କରିବା ସହ ତା ନିଆକଟରୁ ୪୦ ହଜାର ଟଙ୍କା ଓ ଏକ ସୁନା ଚେନ ଜବତ କରିଛି । ସୂଚନା ଅନୁସାରେ ଡାକ୍ତର ଅକ୍ଷୟ ନିଜ ଶାଶୁଙ୍କ ଦଶାହ କାର୍ଯ୍ୟରେ ଯୋଗ ଦେବାକୁ କଟକ ଯାଇଥିବା ବେଳେ ଗତ ୩ ତାରିଖ ରାତିରେ ତାଙ୍କ ଘଋ ୧ ଲକ୍ଷ ଟଙ୍କା ଓ ସୁନଗହଣା ଚୋରି ହୋଇଥିଲା । ୪ ତାରିଖ ସକାଳେ ଡାକ୍ତରଙ୍କ ଘରେ କାମ କରୁଥିବା ଗଗନ ବେହେରା ଘର ତାଲା ଭାଙ୍ଗି ଚୋରି ହୋଇଥିବା ଜାଣି ଡ଼ା.ଅକ୍ଷୟଙ୍କୁ ଜଣାଇଥିଲେ । ଡାକ୍ତର ସେହିଦିନ ହିଁ ଆସି ଥାନାରେ ଅଭିଯୋଗ କରିଥିଲେ । ଅଭିଯୋଗ ପାଇବା ପରେ ପୁଲିସ ତଦନ୍ତ କରି ଢେଙ୍କାନାଳ ଜିଲ୍ଲା ତୁମୁସିଙ୍ଗା ଥାନା କୋଟଗରା ଗ୍ରାମର ସୁମନ୍ତ ରାଉଳ ଯେ କି , ଡାକ୍ତରଙ୍କ ଘରେ ରୋଷେଇ କାମ ଓ ଘରର ଅନ୍ୟାନ୍ୟ କାମ କରେ ତାକୁ ଗିରଫ କରିଥିଲା । ପୁଲିସ ସୂଚନା ଅନୁସାରେ , ସୁମନ୍ତ ଡାକ୍ତରଙ୍କ ଘରେ କାମ କରିବା ସହ ନିକଟରେ ଏକ ଭଡା ଘରେ ରହୁଥିଲା । ଡାକ୍ତରଙ୍କ ଘରେ କାମ କରୁଥିବା ବେଳେ ଡାକ୍ତରଙ୍କ ଘରେ କେଉଁଠି ଟଙ୍କା ଓ ସୁନା ଅଛି ତାହା ସେ ନଜର ରଖିଥିଲା । ଆଉ ୩ ତାରିଖ ରାତିରେ ଘରେ କେହି ନଥିବାର ସୁଯୋଗ ନେଇ ସେ ଘରର ତାଲା ଭାଙ୍ଗି ଭିତରେ ପଶିବା ପରେ ଆଲମୀରା ଭାଙ୍ଗି ଟଙ୍କା ଓ ସୁନା ଅଳଙ୍କାର ଧରି ଚମ୍ପଟ ମାରିଥିଲା । ଚୋରି କରିବା ପରେ ସୁମନ୍ତ ଗୋଟିଏ ପରେ ଗୋଟିଏ ସ୍ଥାନକୁ ପଲାଉଥିଲା । ପୁଲିସ ତାକୁ ଧରିବାକୁ କଟକ,ଢେଙ୍କାନାଳ, ପାଲଲହଡ଼ା ,ତାଳଚେର ଚଢ଼ାଉ କରି ବିଫଳ ହେଉଥିଲା । ଶେଷରେ ବୁଧବାର ଦିନ ଅନଗୁଳ ବୁଢ଼ୀ ଠାକୁରାଣୀ ଛକ ନିକଟରେ ଥିବା ପୁଲିସ ଖବର ପାଇ ତଦନ୍ତକାରୀ ଅଧିକାରୀ ପ୍ରସନ୍ନ କୁମାର ରାଉଳ ଓ ନାଲକୋ ଥାନା ଆଇଆଇସି ବିନ୍ଦୁବାସିନୀ ବିଶ୍ୱାଳଙ୍କ ନିର୍ଦ୍ଦେଶ କ୍ରମେ ସାଧା ପୋଷାକରେ ଚଢ଼ାଉ କରି ତାକୁ ଧରିବାରେ ସଫଳ ହୋଇଥିଲେ । ସୁମନ୍ତଙ୍କ ଠାରୁ ନଗଦ ୪୦ହଜାର ୭ଶହ ଟଙ୍କା ଓ ୧୫ଗ୍ରାମର ସୁନା ଚେନ ପୁଲିସ ଜବତ କରିବା ସହ ତାକୁ ଗିରଫ କରି କୋର୍ଟ ଚାଲଣ କରିଛି ।
Advertisement
