ଭିଜିଲାନ୍ସ କବଜାରେ ସହକାରୀ ନିର୍ବାହୀ ଯନ୍ତ୍ରୀ – ୫୦ ହଜାର ଟଙ୍କା ନେଉଥିଲେ ଲାଞ୍ଚ

ତାଳଚେର – ଅନୁଗୁଳ ଜିଲ୍ଲା ତାଳଚେର RWSS ର ସହକାରୀ ନିର୍ବାହୀ ଯନ୍ତ୍ରୀ ସନ୍ତୋଷ ସାହୁ ଲାଞ୍ଚ ନେବା ବେଳେ ଆଜି ଭିଜିଲାନ୍ସ ହାତରେ ଧାରା ପଡିଛନ୍ତି । ସୂଚନା ଅନୁସାରେ କଣିହାଁ ଅଞ୍ଚଳର ପ୍ରତାପ କୁମାର ପଟ୍ଟନାୟକ ନାମକ ଜଣେ ଠିକାଦାର RWSS ଠାରୁ ଠିକା ନେଇ ପାଇପ କାମ , ରଙ୍ଗ କାମ ସହ ଅନ୍ୟାନ୍ୟ କାମ ନେଇଥିଲେ । ଏଥି ବାବଦ ସେ RWSS ବିଭାଗରୁ ବିଲ ପାଇବାର ଥିଲା । ଏହିସବୁ ବିଲ ପାସ କରିଦେବା ପାଇଁ ସେ ଅଫିସକୁ ଅନେକ ସମୟରେ ଦୌଡିଥିଲେ ମଧ୍ୟ ଫଳ କିଛି ହେଉ ନଥିଲା । ସହକାରୀ ନିର୍ବାହୀ ଯନ୍ତ୍ରୀ ସନ୍ତୋଷ ସାହୁ ଏହି ସବୁ ବିଲ ପାସ କରାଇ ଦେବା ପାଇଁ ପ୍ରତାପଙ୍କୁ ୫୦ହଜାର ଟଙ୍କା ଲାଞ୍ଚ ମାଗିଥିଲେ । ବାଧ୍ୟ ହୋଇ ପ୍ରାତପ ଭିଜିଲାନ୍ସର ଦ୍ଵାରସ୍ଥ ହୋଇଥିଲେ । ଆଉ ଆଜି ପଚାଶ ହଜାର ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ତାଙ୍କୁ କାବୁ କରିଥିଲା । ସହକାରୀ ନିର୍ବାହୀ ଯନ୍ତ୍ରୀ ସନ୍ତୋଷ ସାହୁ ନିଜ ଅଫିସରେ ଲାଞ୍ଚ ନେଉଥିବା ବେଳେ ଭିଜିଲାନ୍ସର ଡି. ଏସ.ପିଙ୍କ ନେତୃତ୍ୱରେ ଢେଙ୍କାନାଳ ,କଟକ , ଅନୁଗୁଳର ମିଳିତ ଟିମ ଏହି ଚଢାଉ କରି ତାଙ୍କୁ କାବୁ କରି ଗିରଫ କରିଛି । ତାଙ୍କଠାରୁ ଲାଞ୍ଚ ନିଆ ଯାଇଥିବା ୫୦ ହଜାର ଟଙ୍କା ଜବତ କରା ଯାଇଥିବା ବେଳେ ଭିଜିଲାନ୍ସ ବିଭାଗ ତାଙ୍କ ଅଫିସ ଓ ଘରେ ବିଭିନ୍ନ ପ୍ରକାର କାଗଜପତ୍ର ଜାଞ୍ଚ କରୁଛି ।

Advertisement