ଅନୁଗୁଳ – ଅନୁଗୁଳ ବନଖଣ୍ଡ ବନ୍ତଳା ବନାଞ୍ଚଳ ଅନ୍ତର୍ଗତ ତଳଗଡ଼ ଗାଁ ନିକଟ ଜଙ୍ଗଲରେ ଏକ ଦନ୍ତାହାତୀର ମୃତ ଦେହ ପଡିଥିବା ଶୁକ୍ରବାର ଦେଖିବାକୁ ମିଳିଛି । ଏହାର ମୃତ୍ୟୁ ବିଦ୍ୟୁତ ଆଘାତ ଦ୍ୱାରା ହୋଇଥିବା ପ୍ରାଥମିକ ଅନୁସନ୍ଧାନରୁ ଜଣାପଡିଛି । ତେବେ ଏହି ଘଟଣାରେ ବନ୍ତଳା ବନାଞ୍ଚଳ ପକ୍ଷରୁ ଜୈନିକ ବ୍ୟକ୍ତିଙ୍କୁ ଗିରଫ କରାଯାଇଥିବା ବନ୍ତଳା ବନାଞ୍ଚଳ ଅଧିକାରୀ ସୂଚନା ଦେଇଛନ୍ତି । ସୂଚନା ଅନୁସାରେ ବନ୍ତଳା ବନାଞ୍ଚଳ ଅନ୍ତର୍ଗତ ତଳଗଡ଼ ପଞ୍ଚାୟତର ଲୋକେ ଚାଷ ବାସ କରି ପ୍ରାୟତଃ ନିଜର ଜୀବିକା ନିର୍ବାହ କରନ୍ତି । ଜଙ୍ଗଲକୁ ଲାଗି ଏହି ଗାଁର ପ୍ରାୟ ଚାଷ ଜମିଗୁଡିକ ରହିଛି । ଜଙ୍ଗଲୀ ପଶୁ ବହୁ ସମୟରେ ଚାଷ ଜମିକୁ ପଶି ଫସଲ ନଷ୍ଟ କରୁଥିବା ବେଳେ କେତେକ ସମୟରେ ଲୋକେ ଏହି ଜନ୍ତୁ ମାନଙ୍କ ଦାଉରୁ ଫସଲ ରକ୍ଷା ପାଇଁ ବିଦ୍ୟୁତ ତାର ମାଧ୍ୟମରେ ବାଡ଼ ଦେଇଥାନ୍ତି । ତେବେ ଶୁକ୍ରବାର ଏମିତି କିଛି ଘଟଣା ଘଟି ଏକ ଦନ୍ତାହାତୀର ପ୍ରାଣ ଯାଇଥିବା ଜଣାପଡିଛି । ତଳଗଡ଼ ଗାଁର ଯୋଗିନାଥ ପ୍ରଧାନ ନିଜର ଚାଷ ଜମିରେ ଫସଲ ରକ୍ଷା ପାଇଁ ବିଦ୍ୟୁତ ତାର ମାଧ୍ୟମରେ ବାଡ଼ ଦେଇଥିଲେ । ଫସଲ ଖାଇବାକୁ ଆସିଥିବା ବେଳେ ଏକ ଦନ୍ତାହାତୀ ଦେହରେ ବିଦ୍ୟୁତ ଆଘାତ ଲାଗି ତାର ମୃତ୍ୟୁ ହୋଇଥିବା ଜଣାପଡିଛି । ଏହି ଘଟଣାରେ ଯୋଗିନାଥଙ୍କୁ ବନବିଭାଗ ଅଟକ ରଖିଥିବା ବନ୍ତଳା ବନାଞ୍ଚଳ ଅଧିକାରୀ ମାଧବଚନ୍ଦ୍ର ନାଏକ ସୂଚନା ଦେଇଛନ୍ତି ।
Advertisement
