ତାଳଚେର – ଭାରତ ସରକାରଙ୍କର କେନ୍ଦ୍ର ସାର ଓ ରସାୟନ ତଥା ନବୀକରଣୀୟ ଉର୍ଜ୍ଜା ବିଭାଗର ରାଷ୍ଟ୍ରମନ୍ତ୍ରୀ ଭଗୱନ୍ତ ଖୁବା ଆଜି ଦୁଇଦିନିଆ ଅନୁଗୁଳ ଜିଲ୍ଲା ତାଳଚେର ଗସ୍ତରେ ଆସିଛନ୍ତି । ସେ ବିକ୍ରମପୁର ସ୍ଥିତ ନିର୍ମାଣାଧିନ ତାଳଚେର ଫର୍ଟିଲାଇଜର ଲିଃ ପ୍ଲାଣ୍ଟ ପରିଦର୍ଶନ କରିଛନ୍ତି । ଆଜି ସେ ଅନୁଗୁଳ ଜିଲ୍ଲା ତାଳଚେରରେ ପୁନରୁଦ୍ଧାର ହେଉଥିବା ତାଳଚେର ଫର୍ଟିଳାଇଜର ଲିମିଟେଡରେ ସକାଳ ୧୦ ଟା ବେଳେ ପହଞ୍ଚିଥିଲେ । ଏଠାରେ ମନ୍ତ୍ରୀଙ୍କୁ ଗାର୍ଡ ଅଫ ଅନର ଦେବା ପରେ ମନ୍ତ୍ରୀ ନିର୍ମାଣ ଚାଲିଥିବା ସାର ଖାରଖାନାର କାମ ବୁଲି ଦେଖିଥିଲେ । ଏହାପରେ ସେ ତାଳଚେର ଫର୍ଟିଳାଇଜର ଲିମିଟେଡର ପଦାଧିକାରୀ ମାନଙ୍କ ସହ ଏକ ବୈଠକରେ ଯୋଗ ଦେଇଛନ୍ତି । କାରଖାନା ସମ୍ବନ୍ଧୀୟ ବିଭିନ୍ନ ପ୍ରସଙ୍ଗ ନେଇ ଟିଏଫଏଲ ପଦାଧିକାରୀ ଏବଂ ପିଡିଆଇଏଲ ଟିମ୍ଙ୍କ ସହ ଏକ ସମୀକ୍ଷା ବୈଠକ କରିବାସହ ଏନେଇ ବିସ୍ତୃତ ଆଲୋଚନା କରିଥିଲେ । ଏହି ନିର୍ମାଣାଧିନ ସାରକାରଖାନାରେ ବିଭିନ୍ନ ଆନୁସଙ୍ଗିକ ସୁବିଧା ସର୍ମ୍ପକରେ ଅବଗତ ହେବା ପାଇଁ ମନ୍ତ୍ରୀ କାର୍ଯ୍ୟସ୍ଥଳ ବୁଲି ଦେଖିଥିଲେ । ଆଜି ମନ୍ତ୍ରୀ ଅନୁଗୁଳ ନାଲକୋ ଠାରେ ରାତ୍ରିଯାପନ କରିବାର କାର୍ଯ୍ୟକ୍ରମ ରହିଛି । ଆସନ୍ତା କାଲି ପୁଣି ସେ ତାଳଚେର ଫର୍ଟିଳାଇଜର ଲିମିଟେଡ ଯିବା ସହ ବୈଠକ କରିବାର ଅଛି । ତାଳଚେର ଫର୍ଟିଳାଇଜର ଲିମିଟେଡର ପୁନରୁଦ୍ଧାର କାର୍ଯ୍ୟ ଚାଲୁ ରହିଥିବା ବେଳେ ବଡ଼ ବଡ଼ ଯନ୍ତ୍ରାଂଶ ଆସି ପହଂଚିଲାଣି । ଏଣୁ ଯଥାଶୀଘ୍ର କିଭଳି କାମ ସରିବ ଏବଂ ତାଳଚେର ଫର୍ଟିଳାଇଜର ଲିମିଟେଡ କାର୍ଯ୍ୟକ୍ଷମ ହେବ ସେଥିପାଇଁ ମନ୍ତ୍ରୀ ଅଧିକାରୀ ମାନଙ୍କ ସହ ଆଲୋଚନା କରିବା ସହ କାର୍ଯ୍ୟ ତଦାରଖ କରିବା ଏହି ଦୁଇ ଦିନିଆ କାର୍ଯ୍ୟକ୍ରମରେ ରହିଛି ।
Advertisement
