ଅନୁଗୁଳ – ପ୍ରକାଶ ପାଇଲା ୨୦୨୧ ମସିହାର ଓଜେଏସ ରେଜଲ୍ଟ । ଓଡ଼ିଶା ନ୍ୟାୟିକ ପରୀକ୍ଷାରେ ବାଜି ମାରିଛନ୍ତି ଝିଅ । ଚଳିତବର୍ଷ ଅନୁଗୁଳର ଝିଅ ଆଦ୍ୟାଶା ମିଶ୍ର ଓଜେଏସ ଟପ୍ପର ହୋଇଛନ୍ତି । ସେହିପରି ପ୍ରକାଶ ପାଇଥିବା ରେଜଲ୍ଟରେ ଦ୍ବିତୀୟ ସ୍ଥାନରେ ଅଛନ୍ତି ଚେତନା ପଟ୍ଟନାୟକ ଏବଂ ତୃତୀୟ ସ୍ଥାନରେ ରହିଛନ୍ତି ଗୀତାଞ୍ଜଳୀ ନାଇଡୁ । ଅଦ୍ୟଶାଙ୍କ ଘର ଅନୁଗୁଳ ମିଶ୍ରପଡ଼ାରେ ହୋଇଥିବା ବେଳେ ଦୀର୍ଘବର୍ଷ ହେଲା ସେ ଭୁବନେଶ୍ଵରର ଆଇଟିଇଆର୍ ସ୍କୋୟାରରେ ପରିବାର ସହ ରୁହନ୍ତି । ଓୟୁଏଟିର ପ୍ରଫେସର ପ୍ରଭାତ ରଞ୍ଜନ ମିଶ୍ର ଓ ମା ’ ବିଜୟ ଲକ୍ଷ୍ମୀ ମିଶ୍ରଙ୍କ କନ୍ୟା ହେଉଛନ୍ତି ଆଦ୍ୟାଶା । ତାଙ୍କର ଏହି ସଫଳତା ପାଇଁ ତାଙ୍କୁ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟୁଛି । ଅଦ୍ୟଶା ୟୁନିଟ୍ – ୮ ଡିଏଭି ପବ୍ଲିକ୍ ସ୍କୁଲରେ ଯୁକ୍ତ ୨ ଶେଷ କରିଥିଲେ । ସେ ବାଣିଜ୍ୟରେ ଟପ୍ପର ହୋଇଥିଲେ । ପରେ ବାଣୀବିହାରରେ ଇଣ୍ଟିଗ୍ରେଡେଟ୍ ଲ’ ଅଧ୍ୟୟନ କରିଥିଲେ । ଏଥିରେ ମଧ୍ୟ ସେ ଶ୍ରେଷ୍ଠ ସ୍ଥାନ ଅର୍ଜନ କରିଥିବା ବେଳେ ସୋଆ ବିଶ୍ଵବିଦ୍ୟାଳୟରେ ଏଲ୍ଏଲ୍ଏମ୍ ଶେଷ କରି ଓଜେଏସ୍ ପାଇଁ ପ୍ରସ୍ତୁତି ଆରମ୍ଭ କରିଥିଲେ । ପ୍ରଥମ ପ୍ରୟାସରେ ସେ ଏହି ସଫଳତା ପାଇଛନ୍ତି । ଆଦ୍ୟାଶା ତାଙ୍କ ସଫଳତାର ଶ୍ରେୟ ବାପା ଓ ମା’ଙ୍କୁ ଦେଇଛନ୍ତି । ତାଙ୍କ ପାଇଁ ବାପା ଓ ମା ’ ବହୁତ ତ୍ୟାଗ କରିଛନ୍ତି । ସାଙ୍ଗମାନଙ୍କ ସହିତ ସମ୍ପର୍କୀୟମାନେ ବହୁତ ସାହାଯ୍ୟ କରିଛନ୍ତି । ଓଜେଏସ୍ ପାଇଁ ସେ ଦୈନିକ ୬ ଘଣ୍ଟାରୁ ଅଧିକ ପରିଶ୍ରମ କରୁଥିଲେ । ଦେଶର ଆଇନ୍ ସେବା ନେଇ ଜନସାଧାରଣ ସଚେତନ ନାହାନ୍ତି । ମହିଳାଙ୍କୁ ନ୍ୟାୟ ଦେବା ପାଇଁ ଚେଷ୍ଟା କରିବି । ମହିଳାଙ୍କୁ ନ୍ୟାୟ ଦେଇପାରିଲେ ନିଜକୁ ଧନ୍ୟମନେ କରିବି ବୋଲି ଆଦ୍ୟାଶା ପ୍ରକାଶ କରିଛନ୍ତି । ଏ ଯାତ୍ରା ମୋ ପାଇଁ ବହୁତ କଷ୍ଟସାଧ୍ୟ ଥିଲା । ମୋ ପାଇଁ ବାପା, ମା’ ବହୁତ ତ୍ୟାଗ କରିଛନ୍ତି । ଧର୍ଯ୍ୟ ଧରି ପାଠପଢ଼ା ଉପରେ ଧ୍ୟାନ ଦେଲେ ସଫଳତା ନିଶ୍ଚିତ ମିଳିବ ବୋଲି ଅଦ୍ୟଶା କହିଛନ୍ତି ।
Advertisement
