ଛେଣ୍ଡିପଦା – ଅନୁଗୁଳ ଜିଲ୍ଲା ଛେଣ୍ଡିପଦା ଥାନା ଶିମିଳିପାଳ କମାରଘାଇ ପୋଲ ନିକଟରେ ଏକ ସ୍କୁଟି ଧକ୍କାରେ ଆଜି(ଶୁକ୍ରବାର) ସକାଳ ୭ ଟା ବେଳେ ଜଣେ ବୃଦ୍ଧଙ୍କର ମୃତ ହୋଇଛି । ମୃତକ ଜଣକ ହେଲେ ପାତ୍ରପଡା ଗ୍ରାମର ୭୦ ବର୍ଷୀୟ ରାଜକିଶୋର ସାହୁ । ସୂଚନା ଅନୁସାରେ ପାତ୍ରପଡା ଗ୍ରାମର ରାଜକିଶୋର ସାହୁ ୫ ବର୍ଷ ହେବ ବସନ୍ତପୁର ପଞ୍ଚାୟତର ଚାଉଁରିଆପାଳ ଗାଁରେ ନିଜ ଝିଅ ଘରେ ରହୁଥିଲେ । ଆଜି ସକାଳେ କମାରଘାଇ ପୋଲ ନିକଟରୁ ଶୈାଚ ହୋଇ ଘରକୁ ଫେରୁଥିବା ବେଳେ ବସନ୍ତପୁରରୁ ବାଗଡିଆ ଯାଉଥିବା ଏକ ସ୍କୁଟି ତାଙ୍କୁ ଧକ୍କା ଦେଇଥିଲା । ଫଳରେ ସେ ରାସ୍ତାକଡକୁ ଛିଟିକି ପଡିଥିଲେ । ଖବରପାଇ ପରିବାର ଲୋକ ଘଟଣା ସ୍ଥଳରେ ପହଞ୍ଚି ଗୁରୁତର ବୃଦ୍ଧଙ୍କୁ ଛେଣ୍ଡିପଦା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଖବର ପାଇ ଛେଣ୍ଡିପଦା ପୁଲିସ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ କରିଛି ।
Advertisement
