ତାଳଚେର – ଅନୁଗୁଳ ଜିଲ୍ଲା ତାଳଚେର ଥର୍ମାଲ ପ୍ଲାଣ୍ଟ ବନ୍ଦ ପ୍ରତିବାଦରେ ଆଜି ତାଳଚେରରେ ଢେଙ୍କାନାଳ ସାଂସଦ ମହେଶ ସାହୁଙ୍କ ନେତୃତ୍ୱରେ ତାଳଚେର କ୍ରିୟାନୁଷ୍ଠାନ କମିଟି ପକ୍ଷରୁ ଚାରି ଘଣ୍ଟିଆ ଅର୍ଥନୈତିକ ଅବରୋଧ କରାଯାଇଥିଲା । ଏଥିଯୋଗୁଁ ଉଭୟ ଟ୍ରକ ଓ ରେଳ ୱାଗନ ଯୋଗେ ବିଭିନ୍ନ ଶିଳ୍ପାନୁଷ୍ଠାନକୁ କୋଇଲା ପରିବହନ ବନ୍ଦ ରହିଥିଲା । ଆନ୍ଦୋଳନକାରୀମାନେ ତାଳଚେର ଓ କଣିହାଁ ଅଞ୍ଚଳର ୬ ଟି ମୁଖ୍ୟ ସ୍ଥାନରେ ଧାରଣା ଦେବାସହ ଅର୍ଥନୈତିକ ଅବରୋଧ କରିଥିଲେ । ତାଳଚେର ବାଙ୍କଧରା ଛକ, ଏନଟିପିସି ଏମଜିଆର ନିକଟ ଆମ୍ବପାଳ ଗାଁ ଲେବୁଲ କ୍ରସିଂଠାରେ ରେଳରୋକ ଆନ୍ଦୋଳନ ଯୋଗୁଁ ତାଳଚେର କୋଇଲାଖଣିରୁ ଏନଟିପିସି ପ୍ଲାଣ୍ଟକୁ ରେଳ ଯୋଗେ କୋଇଲା ଯୋଗାଣ ବନ୍ଦ ହୋଇଥିଲା । ସେହିପରି କମିଟି ପକ୍ଷରୁ କଣିହାଁ କୋଇଲାଖଣି ସମ୍ମୁଖରେ ଆନ୍ଦୋଳନ କରିବା ଯୋଗୁଁ କୋଇଲା ପରିବହନ ବାଧାପ୍ରାପ୍ତ ହୋଇଥିଲା । ଏହି ଅର୍ଥନୈତିକ ଅବରୋଧ ଯୋଗୁଁ ଉଭୟ କେନ୍ଦ୍ର ଓ ରାଜ୍ୟ ସରକାର କୋଟି କୋଟି ଟଙ୍କାର ରାଜସ୍ଵ ହରାଇ ଥିବାର ଜଣାପଡ଼ିଛି । ଏହାକୁ ଶ୍ରମିକ ଏକତା ମଞ୍ଚ , ତାଳଚେର ଓକିଲ ସଂଘ ସହ ବହୁ ସଂଗଠନ , ରାଜନୈତିକ ନେତ୍ରୁବୃନ୍ଦ ଓ ସାଧାରଣ ଜନତା ସମର୍ଥନ ଜଣାଇଛନ୍ତି । ତାଳଚେରରୁ କୋଇଲା ରପ୍ତାନି ହୋଇ ରାଜ୍ୟ ତଥା ରାଜ୍ୟ ବାହାରର ଅନେକ କଳ କାରଖାନା ଚାଲୁଛି । ଅଥଚ ଏଠାରେ କାରଖାନା ବନ୍ଦ କରି ଦିଆ ଯାଉଛି । ତେଣୁ ତାଳଚେରବାସୀ ଏହାକୁ ଆଦୌ ବରଦାସ୍ତ କରିବେ ନାହିଁ । ପ୍ଲାଣ୍ଟ ଚାଲୁ ନହେଲେ ଆଗାମୀ ଦିନରେ ପରିସ୍ଥିତି ଆହୁରି ଭୟାବହ ହେବ ବୋଲି କମିଟି ଚେତାବନୀ ଦେଇଛି । ଅପରପକ୍ଷେ ଥର୍ମାଲ ପ୍ଲାଣ୍ଟ ଖୋଲିବା ଦାବିରେ ଫାଟକ ସମ୍ମୁଖରେ ଶ୍ରମିକ ଏକତା ମଞ୍ଚ ପକ୍ଷରୁ ଧାରଣା ଓ ବିକ୍ଷୋଭ ଦୀର୍ଘଦିନ ଧରି ଜାରି ରହିଛି ।
Advertisement
