ଅନୁଗୁଳ – ଅନୁଗୁଳ ଜିଲ୍ଲା ମହାନଦୀର ସାତକୋଶିଆ ଗଣ୍ଡର ଅକାତ କାତ ପାଣିରେ ହଜି ଯାଇଛନ୍ତି ନବଜାତକ ଘଡ଼ିଆଳ ଶାବକ । ବନ ବିଭାଗ ପକ୍ଷରୁ ବହୁ ଖୋଜା ଖୋଜି ପରେ କିଛି ଶାବକଙ୍କ ପତ୍ତା ମିଳିଥିବା ବେଳେ ଆଜି ପର୍ଯ୍ୟନ୍ତ କିଛିଙ୍କୁ ଠାବ କରି ପାରିନାହିଁ । ଆଉ ଏଥିପାଇଁ ଶନିବାର ସାତକୋଶିଆ ବନଖଣ୍ଡର ଟିକରପଡା ବନାଞ୍ଚଳ ବନବିଶ୍ରାମ ଗୃହରେ ଏକ ରୁଦ୍ଧଦ୍ୱାରା ବୈଠକ ବସିଥିବା ଜଣାପଡିଛି । ଅନୁଗୁଳ ବନମଣ୍ଡଳ ତଥା ସାତକୋଶିଆ ବ୍ୟାଘ୍ର ପ୍ରକଳ୍ପର କ୍ଷେତ୍ର ନିର୍ଦେଶକ ପ୍ରଦୀପରାଜ କରାଟେଙ୍କ ତତ୍ୱାବଧାନରେ ୬ ବନଖଣ୍ଡ ଅଧିକାରୀଙ୍କୁ ନେଇ ଏହି ବୈଠକ ଆରମ୍ଭ ହୋଇଥିଲା । ସୂଚନା ଅନୁସାରେ ମହାନଦୀର ସାତକୋଶିଆ ଗଣ୍ଡ ବଳଦମଡା ଠାରେ ପ୍ରାକୃତିକ ଆବାସ ସ୍ଥଳୀରେ ଜନ୍ମ ନେଇଥିବା ୨୮ ଘଡ଼ିଆଳ ଶାବକ ନଦୀର ଗଭୀର ଜଳକୁ ପ୍ରବେଶ କରିଛନ୍ତି । ମା ଘଡ଼ିଆଳ ଠାରୁ ଏମାନେ ଅଲଗା ହୋଇ ଏବେ ନଦୀକୁ ପ୍ରବେଶ କରି ଜଳକ୍ରୀଡା କରିଛନ୍ତି । ଦେଢ଼ ଫୁଟ ଲମ୍ବ ବିଶିଷ୍ଟ ଏହି ଶାବକ ଗୁଡିକୁ ସୁରକ୍ଷା ଦେବା ପାଇଁ ବନବିଭାଗ ଅଣ୍ଟା ଭିଡ଼ିଛି । ପ୍ରାକୃତିକ ଉପାୟରେ କିପରି ଏହି ଶାବକ ଗୁଡିକୁ ସୁରକ୍ଷା ଦେଇ ହେବ ଓ ଗଣ୍ଡରେ କିପରି ଘଡ଼ିଆଳ ବଂଶ ବୃଦ୍ଧି ହୋଇ ପାରିବ ସେ ନେଇ ଆଲୋଚନା ହୋଇଛି । ଶନିବାର ସାତକୋଶିଆ ବନଖଣ୍ଡ ଅନ୍ତର୍ଗତ ଟିକରପଡା ବନ୍ୟପ୍ରାଣୀ ବନାଞ୍ଚଳ ଠାରେ ଥିବ ବନବିଶ୍ରାମ ଗୃହ ଠାରେ ଆଠମଲ୍ଲିକ, ସାତକୋଶିଆ,ମହାନଦୀ, ନୟାଗଡ଼, କଟକ ଓ ବୌଦ୍ଧ ବନଖଣ୍ଡ ଅଧିକାରୀ ମାନଙ୍କୁ ନେଇ ଏକ ବୈଠକ ଅନୁଷ୍ଠିତ ହୋଇଥିଲା । ଏଥିରେ ଘଡ଼ିଆଳ ଶାବକ ଗୁଡିକୁ କିପରି ଯଥା ଶୀଘ୍ର ଠାବ ଓ ସଠିକ ଭାବେ ଚିହ୍ନଟ କରାଯିବ ସେ ନେଇ ଆଲୋଚନା କରା ଜିଥିବା ଜଣା ପଡିଛି । ଆଗକୁ ନଦୀରେ ପ୍ରବଳ ମାତ୍ରାରେ ବନ୍ୟାଜଳ ପ୍ରବାହିତ ହେବାର ଆଶଙ୍କା ରହିଛି । ଏ ଭଳି କଠିନ ପରିସ୍ଥିତିରେ ଏହି କୁମ୍ଭୀର ଛୁଆ ଗୁଡିକୁ କିପରି ସୁରକ୍ଷା ଦେଇହେବ ସେ ଦିଗରେ ୬ ବନଖଣ୍ଡ ଅଧିକାରୀଙ୍କ ସହ ମଧ୍ୟ ଆଲୋଚନା ହୋଇଛି । ଅନ୍ୟପକ୍ଷେ ନଦୀରେ ଏବେ ପେଟ୍ରୋଲିଂକୁ ମଧ୍ୟ ବଢ଼ାଇ ଦିଆଯାଇଛି । ନଦୀର ପ୍ରଖର ସ୍ରୋତରେ କାଳେ ଏହି ଛୁଆ ଗୁଡିକ ଭାସି ଯାଇଥିବେ ସେଥି ପାଇଁ ବୌଦ୍ଧ ଓ ନୟାଗଡ଼ ବନଖଣ୍ଡରେ ଅଧିକ ଟିମ ଗଠନ କରି ପେଟ୍ରୋଲିଂ କରାଯିବ । ଅନ୍ୟପକ୍ଷେ ବଳଦମଡା ଠାରୁ ଉପର ମୁଣ୍ଡ ଆଠମଲ୍ଲିକ ଓ ତଳମୁଣ୍ଡ ବଡ଼ମୂଳ ପର୍ଯ୍ୟନ୍ତ ନଦୀର ପାର୍ଶ୍ଵରେ ଥିବା ଛୋଟ ନାଳ ଗୁଡିକୁ ଡ୍ରୋନ କ୍ୟାମେରା ଦ୍ୱାରା ମ୍ୟାପିଂ କରାଯିବାର ବ୍ୟବସ୍ଥା କରାଯାଇଛି । ସେହିପରି ସାତକୋଶିଆ ଅଭୟାରଣ୍ୟର ମହାନଦୀ କୁଳବର୍ତ୍ତି ଅଞ୍ଚଳରେ ଥିବା ଗାଁ ଗୁଡିକରେ ଲୋକଙ୍କୁ ସଚେତନତା କାର୍ଯ୍ୟକ୍ରମ କରାଯିବାର ବ୍ୟବସ୍ଥା କରାଯାଇଛି । ସେହିପରି ବିଭିନ୍ନ ସଚେତନତା କାର୍ଯ୍ୟକ୍ରମ ଗୁଡିକ ଗାଁ ଗୁଡିକରେ ଅନୁଷ୍ଠିତ ହୋଇ ଶାବକ ଗୁଡିକୁ ସୁରକ୍ଷା ପାଇଁ କାର୍ଯ୍ୟକ୍ରମ କରାଯାଉଛି ।
Advertisement
