ଅନୁଗୁଳ – ଅନୁଗୁଳ ଜିଲ୍ଲା ସାତକୋଶିଆ ଅଭୟାରଣ୍ୟରେ ଏକ ବିରଳ ପ୍ରଜାତିର ଶାଳିଆପତନି ଠାବ କରା ଯାଇଛି । ବନ୍ୟଜନ୍ତୁଙ୍କ ଗତିବିଧି ଉପରେ ନଜର ରଖିବା ପାଇଁ ଜଙ୍ଗଲରେ ଲଗା ଯାଇଥିବା କ୍ୟାମେରା ଏହାର ଫଟୋ ଉତ୍ତୋଳନ କରିଛି । ସାଧାରଣତଃ ଶାଳିଆପତନି ଗୁଡିକର ରଙ୍ଗ କଳା ହୋଇଥାଏ । କିନ୍ତୁ କ୍ୟାମେରାରେ ଦେଖା ଯାଇଥିବା ଏହି ଶାଳିଆପତନିର ରଙ୍ଗ ଧଳା । ସାତକୋଶିଆର ବନ୍ୟଜନ୍ତୁ ବିଭାଗର ମଝିପଡା ରିଜର୍ଭ ଜଙ୍ଗଲର ଦୁଇଟି ସ୍ଥାନରେ ଏହା କ୍ୟାମେରାରେ ଦେଖା ଯାଇଥିଲା । ଏହାର କାନ୍ଧ ତଳେ ଥିବା ଶରୀରରେ କୌଣସି ଚିହ୍ନ କିମ୍ବା ଦାଗ ନଥିବା ବେଳେ ଲୋମ ଗୁଡିକ ଧଳା ରଙ୍ଗର ଥିଲା । ସେହିଭଳି, ଏହାର ଗୋଡ ଏବଂ ଲାଞ୍ଜରେ କୌଣସି ଦାଗ ନଥିଲା । ଏହା ବ୍ୟତୀତ ଆଖି ତଳେ ଏବଂ ମୁଣ୍ଡରେ ଥିବା ପ୍ୟାଚ୍ ଗୁଡିକ ସ୍ପଷ୍ଟ ଭାବରେ ଦେଖାଯାଉଛି । ଏହି ବିରଳ ପ୍ରଜାତିର ଶାଳିଆପତନି ବହୁ ବର୍ଷ ପୂର୍ବେ ଓଡିଶାର କନ୍ଧମାଳ ଜିଲ୍ଲାରେ ଏବଂ ୨୦୦୪ ମସିହାରେ ରାଜସ୍ଥାନର ଦକ୍ଷିଣ ଭାଗରେ ଦେଖା ଯାଇଥିଲା । ତେବେ ବନ୍ୟଜନ୍ତୁ ଉପରେ ଅନୁସନ୍ଧାନ କରୁଥିବା ବିଶେଷଜ୍ଞଙ୍କ କହିବା କଥା , ରଙ୍ଗର ପରିବର୍ତ୍ତନ ପ୍ରାୟତ ଜଳବାୟୁ ଏବଂ ଭୂଗୋଳ ପରିବର୍ତ୍ତନ ଦ୍ୱାରା ପ୍ରଭାବିତ ହୋଇଥାଏ, ତେଣୁ ଏହି ପ୍ରଜାତି ଉପରେ ଅଧିକ ଅନୁସନ୍ଧାନ ଆବଶ୍ୟକ ରହିଛି । ଏଠାରେ ସୂଚନାଯୋଗ୍ୟ ଯେ ସାତକୋଶିଆରେ ଏହା ପୂର୍ବରୁ ଧଳା ଚିତଲ ହରିଣ ମଧ୍ୟ ୨୦୧୪ ମସିହା ବେଳକୁ ଦେଖିବାକୁ ମିଳିଥିଲା । ଯାହାର ରଙ୍ଗ ସଂପୂର୍ଣ୍ଣ ଧଳା ଥିଲା ।
Advertisement
