ବଅଁରପାଳ – ଅନୁଗୁଳ ଜିଲ୍ଲା ବଅଁରପାଳ ଥାନା ଅନ୍ତର୍ଗତ ଲଙ୍ଗୁଳିଆବେଡ଼ା ଗ୍ରାମରେ ଘର ସମ୍ପତ୍ତିରେ ଭାଗକୁ ନେଇ ଭଉଣୀକୁ ହତ୍ୟା ଘଟଣାରେ ପୁଲିସ ଅଭିଯୁକ୍ତ ଭାଇ ସମେତ ତିନି ଜଣଙ୍କୁ ଗିରଫ କରିଛି । ବଅଁରପାଳ ଥାନା ପୁଲିସ ସୂଚନା ଅନୁସାରେ ଲଙ୍ଗୁଳିଆବେଡ଼ା ଗ୍ରାମର ଊର୍ମିଳା ବିଶ୍ଵାଳ ଓ ଭାଇ ହରିଶ ଚନ୍ଦ୍ର ବିଶ୍ଵାଳଙ୍କ ମଧ୍ୟରେ ଘର ସମ୍ପତ୍ତିର ଭାଗକୁ ନେଇ ଅଧିକାଂଶ ସମୟରେ ଝଗଡ଼ା ହେଉଥିଲା । ଗତ ମାସ ୨୮ ତାରିଖ ଦିନ ସମ୍ପତ୍ତିର ଭାଗବଣ୍ଟା ନେଇ ଗ୍ରାମ ମୁଖିଆମାନଙ୍କ ଦ୍ଵାରା ଏକ ବୈଠକ ମଧ୍ୟ ବସିଥିଲା । ହେଲେ ବହୁ ବାଦ ବିବାଦ ମଧ୍ୟରେ ଏହି ବୈଠକରେ କୌଣସି ପ୍ରକାର ସମାଧନ ହୋଇପାରିନଥିଲା । ସେହି ଦିନ ରାତିରେ ପରିବାର ଲୋକ ଘରକୁ ଫେରିଲା ପରେ ଭାଇ ଭଉଣୀଙ୍କ ମଧ୍ୟରେ ପୁଣି ଝଗଡ଼ା ହୋଇଥିଲା । ଏଥିରେ ଭାଇ ହରିଶ, ଭାଉଜ ସଞ୍ଜୁ ବିଶ୍ଵାଳ ଓ ତାଙ୍କ ଝିଅ ଶିବାନୀ ବିଶ୍ଵାଳ ମିଳିତ ଭାବରେ ଊର୍ମିଳାକୁ ନିସ୍ତୁକ ପିଟିଥିଲେ । ଏହା ପରଦିନ ସକାଳ ସମୟରେ ପୁଣି ମାଡ଼ ମାରିଥିଲେ । ଯାହା ଫଳରେ ପୂର୍ବାହ୍ଣ ୯ଟା ସମୟରେ ଊର୍ମିଳାଙ୍କ ମୃତ୍ୟୁ ହୋଇଥିଲା । ବଅଁରପାଳ ପୁଲିସ ଖବର ପାଇ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ଘଟଣାର ତଦନ୍ତ ପରେ ତିନି ଅଭିଯୁକ୍ତଙ୍କୁ ପୁଲିସ ଗିରଫ କରି କୋର୍ଟଚାଲାଣ କରିଛି ।
Advertisement
