ସୁରକ୍ଷାକର୍ମୀଙ୍କ ଗୁଳିରେ ଯୁବକ ଗୁରୁତର

ତାଳଚେର – ଅନୁଗୁଳ ଜିଲ୍ଲା ତାଳଚେର ଏକଘରିଆ ଅଞ୍ଚଳରେ ଗୁଳି ମାଡରେ ଜଣେ ଯୁବକ ଗୁରୁତର ହୋଇଥିବା ଜଣା ପଡ଼ିଛି । ଏକଘରିଆ ଠାରେ ବନ୍ଦ ହୋଇ ପଡ଼ିଥିବା ବିନ୍ଦଲ କାରଖାନାରେ ଏଭଳି ଘଟଣା ଘଟିଛି । ବିନ୍ଦଲ କାରଖାନାର ସୁରକ୍ଷାକର୍ମୀଙ୍କ ଗୁଳି ମାଡରେ ଗୁରୁତର ହୋଇଥିବା ଯୁବକ ଜଣଙ୍କୁ କଟକ ସ୍ଥାନାନ୍ତର କରାଯାଇଛି । ସୁରକ୍ଷାକର୍ମୀଙ୍କ କହିବା ଅନୁସାରେ ଆଜି ଅପରାହ୍ନରେ କିଛି ଯୁବକ କାରଖାନା ପରିସରକୁ ଚୋରି କରିବାକୁ ପଶିଥିବା ବେଳେ ବାଧ୍ୟ ହୋଇ ସେମାନେ ଗୁଳି ଚଳାଇଥିଲେ । ତେବେ ଗୁଳିର କିଛି ଅଂଶ ବିଲିଣ୍ଡା ଗାଁର ଲିପକ ବେହେରାଙ୍କ ଗୋଡ ଓ ପେଟରେ ବାଜିଥିଲା । ଯାହା ଫଳରେ ସେ ଗୁରୁତର ହୋଇଥିବା ବେଳେ ତାଙ୍କୁ ଡାକ୍ତରଖାନାରେ ଭର୍ତ୍ତି କରା ଯାଇଛି । ସେପଟେ ଲିପକଙ୍କ ପରିବାର ଲୋକଙ୍କ କହିବା କଥା ସେମାନେ ମାଛ ମାରିବାକୁ ଯାଇଥିବା ବେଳେ ସୁରକ୍ଷାକର୍ମୀ ମାନେ ସେମାନଙ୍କ ଉପରକୁ ଗୁଳି ଚଳାଇଛନ୍ତି । ଖବର ପାଇ ତାଳଚେର ପୁଲିସ ଘଟଣା ଉପରେ ନଜର ରଖିଥିବା ବେଳେ ଖବର ଲେଖାଯିବା ଯାଏ ଏ ନେଇ କୌଣସି ଲିଖିତ ଅଭିଯୋଗ ହୋଇ ନଥିବା ଜଣା ପଡିଛି ।

Advertisement