ଛେଣ୍ଡିପଦା – ଅନୁଗୁଳ ଜିଲ୍ଲା ଛେଣ୍ଡିପଦା ଥାନା ଅଞ୍ଚଳର ଜଣେ ଯୁବକ ତାଙ୍କ ପ୍ରେମିକାର ଭିଡିଓ ଓ ଫଟୋ ଭାଇରାଲ୍ କରିବା ଅଭିଯୋଗରେ ଗିରଫ ହୋଇଛନ୍ତି । ସୂଚନା ଅନୁସାରେ ଛେଣ୍ଡିପଦା ଥାନା ପୁରୁଣାଗଡ଼ ଗାଁର ଶଶାଙ୍କ ଶେଖର ସାହୁଙ୍କର ଏହି ଥାନା ଅଞ୍ଚଳର ଜଣେ ୨୫ ବର୍ଷୀୟା ଯୁବତୀଙ୍କ ସହିତ କିଛି ବର୍ଷ ହେଲା ପ୍ରେମ ସମ୍ପର୍କ ରହି ଆସିଥିଲା । ସେହି ସମ୍ପର୍କ ମଧ୍ୟରେ ଯୁବତୀଙ୍କ ସହ ତାଙ୍କର କିଛି ଅନ୍ତରଙ୍ଗ ମୁହୁର୍ତ୍ତର ଫଟୋ ଏବଂ ଭିଡିଓ ଶଶାଙ୍କ ନିଜ ପାଖରେ ରଖିଥିଲେ । ତେବେ ସମ୍ପର୍କରେ ଫାଟ ସୃଷ୍ଟି ହେବା ପରେ ଶଶାଙ୍କ ପ୍ରତିଶୋଧପରାୟଣ ହୋଇପଡ଼ିଥିଲେ । ସେ ଯୁବତୀଙ୍କର ଅନ୍ତରଙ୍ଗମୁହୁର୍ତ୍ତର ଫଟୋ ଏବଂ ଭିଡିଓ ସୋସିଆଲ ମେଡିଆରେ ଭାଇରାଲ୍ କରିଥିଲେ । ଏହି କଥା ଜାଣିବା ପରେ ଯୁବତୀଙ୍କ ପରିବାର ସଦସ୍ୟ ୫ ଦିନ ତଳେ ଏ ସମ୍ପର୍କରେ ଛେଣ୍ଡିପଦା ଥାନାରେ ଲିଖିତ ଅଭିଯୋଗ କରିଥିଲେ । ପୁଲିସ ଏକ ମାମଲା ରୁଜୁକରିବା ସହ ଘଟଣାର ତଦନ୍ତ ଚଳାଇଥିଲା । ତେବେ ଶଶାଙ୍କ ଗାଁରୁ ଫେରାର ହୋଇ ଯାଇଥିଲେ । ତଦନ୍ତ ବେଳେ ସେ କୋଲକତାରେ ଥିବା ପୁଲିସ ଜାଣିପାରି ଶଶାଙ୍କଙ୍କୁ କୋଲକାତାରୁ ଗିରଫ କରିଥିଲା । ପଚରା ଉଚୁରା ପରେ ତାଙ୍କୁ କୋର୍ଟ ଚାଲାଣ କରାଯାଇଛି ।
Advertisement
