ଅନୁଗୁଳ – ଅନୁଗୁଳ ଜିଲ୍ଲାବାସୀ ତଥା ଅନୁଗୁଳକୁ କିମ୍ବା ଅନୁଗୁଳ ଦେଇ ଯାଇଥିବା ଜାତୀୟ ରାଜପଥରେ ଯିବା ଆସିବା କରୁଥିବା ଲୋକଙ୍କୁ ଏବେ ବେଶ କଷ୍ଟ ଦେଉଛି ଜାତୀୟ ରାଜପଥ ୫୫ । ମୁଖ୍ୟତଃ ଅନୁଗୁଳ ସହର ମଧ୍ୟ ଦେଇ ବଅଁରପାଳ ଠାରୁ ପଞ୍ଚମହଲା ପର୍ଯ୍ୟନ୍ତ ଜାତୀୟ ରାଜପଥ ମରଣଯନ୍ତା ପାଲଟିଥିବା ବେଳେ ଏହାର ମରାମତି କରା ଯାଉ ନାହିଁ । ମରାମତି ନାମରେ ରାଜପଥରେ ପାଉଁଶ କିମ୍ବା କ୍ରସର ଗୁଣ୍ଡ ପକା ଯାଉଥିବା ବେଳେ ଗାଡି ମୋଟର ଯିବା ଆସିବା କରୁଥିବା ବେଳେ ତାହା ଉଡି ଆହୁରି କଷ୍ଟ ଦେଉଛି । ଆଉ ବର୍ତ୍ତମାନ ହୋଇଥିବା ଲଗାଣ ବର୍ଷା ଯୋଗୁଁ ଏହି ଗୁଣ୍ଡ ସବୁ କାଦୁଅ ପଚପଚ ହୋଇ ଯାଇଛି । ଯାହା ଫଳରେ ଯିବାଆସିବା ଏକ ପ୍ରକାର ଅସମ୍ଭବ ଭଳିଆ ପରିସ୍ଥିତି ଉପୁଜିଛି । ଦିର୍ଘ ବର୍ଷ ଧରି ଏହି ରାଜପଥରେ ଦୁର୍ଘଟଣା ଏକ ନୀତିଦିନିଆ ଘଟଣା ପାଲଟିଯାଇଛି । ଏହାଦ୍ଵାରା ଜନଜୀବନ ହାନି ହେଉଛି । ଏହି ରାଜପଥର ମରାମତି ଲାଗି ବିଭିନ୍ନ ରାଜନୈତିକ ଦଳ , ସାମାଜିକ ଅନୁଷ୍ଠାନ ବାରମ୍ବାର ଦାବି କରୁଥିବା ବେଳେ ଫଳ ଶୂନ । ଅପରପକ୍ଷରେ ଶାସନ ଓ ପ୍ରଶାସନ ଏନ ଏଚ ଏ ଆଇ ବିଭାଗ ସାଙ୍ଗରେ ବାରମ୍ବାର ସମୀକ୍ଷା ବୈଠକ ହେଉଥିବା ବେଳେ ବର୍ତ୍ତମାନ ସୁଦ୍ଧା ଉକ୍ତ ରାଜପଥ ମରାମତି କାମ କେଉଁ ବିଭାଗ ହାତକୁ ନେବ ତାହା ସ୍ପଷ୍ଟ ହୋଇନାହିଁ । କଟକସ୍ଥିତ ମଙ୍ଗୁଳି ଠାରୁ ସମ୍ବଲପୁରକୁ ସଂଯୋଗ କରୁଥିବା ଏହି ଜାତୀୟ ରାଜପଥ ୫୫ର ଏହି ୨୨ କିମି ରାସ୍ତା ଏବେ ଖାଲଖମା , କାଦୁଅରେ ପରିପୂର୍ଣ୍ଣ ହୋଇ ରହିଛି । ୫୫ ନମ୍ବର ଜାତୀୟ ରାଜପଥ ପ୍ରସସ୍ତିକରଣ ଓ ଅନୁଗୁଳରେ ବାଇପାସ ନିର୍ମାଣ ହେବା ସାଙ୍ଗରେ ଅନୁଗୁଳ ଟାଉନ ଭିତରେ ଥିବା ରାଜପଥର ମରାମତି ଦାୟିତ୍ଵ ଏନଏଚଏଆଇ ଅଧୀନରେ ରାହିଛି । କିନ୍ତୁ ଗତ ୩ ବର୍ଷ ଧରି ସଠିକ୍ ମରାମତି ହୋଇନଥିବାରୁ ଏହି ୨୨ କିଲୋମିଟର ରାସ୍ତାର ଅବସ୍ଥା ଖରାପ ହୋଇଯାଇଛି । ସମଗ୍ର ରାସ୍ତାର ଅବସ୍ଥା ଏପରି ଯେ ୨୨ କିଲୋମିଟର ଯାତ୍ରା କରିବାକୁ ୨ ଘଣ୍ଟାରୁ ଊର୍ଦ୍ଧ୍ଵ ସମୟ ଲାଗୁଛି । ଏଭଳି ପରିସ୍ଥିତିରେ ଏନଏଚଏଆଇ ପୁରୁଣା ରାସ୍ତା ମରାମତି ପାଇଁ ୨୦୨୧ ମସିହା ନଭେମ୍ବର ୧୭ ତାରିଖରେ ଅନୁଗୁଳ ପିଡବ୍ଲୁଡି ବିଭାଗକୁ ୫୭୮ କୋଟି ଟଙ୍କା ଦେବାକୁ କୁହାଯାଇଥିଲା । ତେବେ ମରାମତି କାର୍ଯ୍ୟ ଲାଗି ଏନ ଏଚଏ ଆଇ ଦେଇଥିବା ଅର୍ଥ ଦ୍ବାରା ମରାମତି ହୋଇପାରିବ ନାହିଁ ବୋଲି ପି ଡବୁ ଡି ସ୍ପଷ୍ଟ ମନା କରିଦେଇଛି । ଫଳରେ ମରାମତି ପାଇଁ ଯେଉଁ ଆଶା ସାଧାରଣ ଲୋକ ରଖିଥିଲେ ତାହା ମଧ୍ୟ ହେଇ ପାରୁ ନାହିଁ । ରାସ୍ତା ମରାମତି ନ ହେଉଥିବାରୁ ଜୀବନକୁ ବାଜି ଲଗାଇ ଏହି ରାସ୍ତାରେ ଯିବାଆସିବା କରୁଛନ୍ତି ଲୋକ । ଏକ ପ୍ରକାର ଯମ ଯନ୍ତ୍ରଣା ଭୋଗୁଛନ୍ତି କହିଲେ ଅତ୍ୟୁକ୍ତି ହେବ ନାହିଁ ।
Advertisement
