କୋଲ ୱାସେରିକୁ ନେଇ ଦୁଇ ଗୋଷ୍ଠୀ ମୁହାଁମୁହିଁ

ତାଳଚେର – ଅନୁଗୋଳ ଜିଲ୍ଲା ତାଳଚେର ଘଣ୍ଟପଡ଼ା ଠାରେ ଥିବା ଗ୍ଲୋବାଲ କୋଲ ୱାସେରିକୁ ନେଇ ସପକ୍ଷବାଦୀ ଓ ବିପକ୍ଷବାଦୀଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା । ଗୋଟିଏ ଗୋଷ୍ଠୀ ପ୍ଲାଣ୍ଟକୁ ଅନ୍ୟତ୍ର ସ୍ଥାନାନ୍ତର ପାଇଁ ଦାବି କରୁଥିବା ବେଳେ ଅନ୍ୟ ଏକ ଗୋଷ୍ଠୀ ଏହାକୁ ବିରୋଧ କରି ପ୍ଲାଣ୍ଟ ସେହିଠାରେ ରହୁବୋଲି ଦାବି କରିଥିଲେ । ସୂଚନା ଅନୁସାରେ ଗ୍ଲୋବାଲ କୋଲ ୱାସେରିରୁ ଉଡୁଥିବା ଧୂଳିକୁ ନେଇ ଆଖପାଖ ପଞ୍ଚାୟତରେ ଜନ ଅସନ୍ତୋଷ ଦେଖାଦେଇଥିଲା । ଯାହାକୁ ନେଇ ଘଣ୍ଟପଡ଼ା ପଞ୍ଚାୟତର ମହିଳାମାନେ ଏହି ଗ୍ଲୋବାଲ କୋଲ ୱାସେରିକୁ ଅନ୍ୟତ୍ର ସ୍ଥାନାନ୍ତରିତ କରିବା ପାଇଁ ପ୍ଲାଣ୍ଟ ସମ୍ମୁଖ ରେ ଧାରଣା ଦେଇଥିଲେ । ଅନ୍ୟପଟେ ଏଠାରେ କାର୍ଯ୍ୟ କରୁଥିବା ଘଣ୍ଟପଡା ସହ ଆଖପାଖ ପଞ୍ଚାୟତର ଶ୍ରମିକମାନେ ମଧ୍ୟ ପ୍ଲାଣ୍ଟ ସ୍ଥାନାନ୍ତରିତ ନହେବା ନେଇ ଧାରଣା ଦେଇଥିଲେ । ଏହି ପ୍ଲାଣ୍ଟଟି ଏହିଠାରୁ ଅନ୍ୟତ୍ର ସ୍ଥାନାନ୍ତର ହେଲେ ଅନେକ ଶ୍ରମିକ ନିଜର ନିଜର ଜୀବିକା ହରାଇବା ସହ ପରିବାର ପ୍ରତିପୋଷଣ କରି ପାରିବେ ନାହିଁ ବୋଲି ଶ୍ରମିକ ମାନଙ୍କ ପକ୍ଷରୁ କୁହାଯାଇଥିଲା । ଏଭଳି ମୁହାଁମୁହିଁ ପରିସ୍ଥିତି ଦେଖି ପ୍ରାୟ ୨ ପ୍ଲାଟୁନ ଫୋର୍ସ ମୃତୟନ କରା ଯାଇଥିଲା । ପରେ ପୁଲିସ ଉଭୟ ପକ୍ଷଙ୍କୁ ବୁଝାସୁଝା କରିବା ପରେ ଏକ ତ୍ରିପାକ୍ଷିକ ଆଲୋଚନା ପରେ ସମାଧାନ କରାଯିବ ବୋଲି କହିବା ପରେ ପରିସ୍ଥିତି ଶାନ୍ତ ପଡିଥିଲା ।

Advertisement