ପାଲଲହଡା – ଅନୁଗୁଳ ଜିଲ୍ଲା ପାଲଲହଡା ସଦରମହକୁମା ସ୍ଥିତ ଶିବମନ୍ଦିର ଛକ ନିକଟରୁ ଆଜି ଅପରାହ୍ନରେ ଖଣ୍ଡା ଏବଂ ବନ୍ଧୁକ ମୁନରେ ଜଣେ ବେପାରୀଙ୍କ ଠାରୁ ୧୫ ଲକ୍ଷ ଟଙ୍କା ଦୁର୍ବୁତ୍ତ ଲୁଟିନେଇଛନ୍ତି । ସୂଚନା ଅନୁସାରେ ରବିବାର ପାଲଲହଡାରେ ସାପ୍ତାହିକ ହାଟ ଥିବାରୁ ସମ୍ବଲପୁର ଅଞ୍ଚଳର ବ୍ୟବସାୟୀ ବଜରଙ୍ଗ ଅଗ୍ରୱାଲଙ୍କର ଦୁଇଜଣ କର୍ମଚାରୀ ଶ୍ୟାମ ପାଣ୍ଡେ ଏବଂ ମନୀଷ ତିୱାରୀ ବାକି ଟଙ୍କା ଆଦାୟ କରିବାପାଇଁ ଏକ କାର ଯୋଗେ ପାଲଲହଡା ଆସିଥିଲେ । ଏହି ଅଞ୍ଚଳରୁ ପ୍ରାୟ ୧୫ ଲକ୍ଷ ଟଙ୍କା ଆଦାୟ କରି ସମ୍ବଲପୁର ଫେରୁଥିବା ବେଳେ ଦିନ ପ୍ରାୟ ୨.୩୦ ସମୟରେ ସ୍ଥାନୀୟ ଶିବମନ୍ଦିର ଛକ ନିକଟ ଜାତୀୟ ରାଜପଥ NH 49 କୁ ସଂଯୋଗ କରୁଥିବା ରାସ୍ତାରେ ଦୁଇଟି ମଟରସାଇକେଲ ଯୋଗେ ୫ ଜଣ ଦୁର୍ବୁତ୍ତ ଅତର୍କିତ ଭାବେ ଉକ୍ତ କାରକୁ ଅଟକାଇ ଥିଲେ । ହଠାତ ସେମାନେ ଖଣ୍ଡା ଏବଂ ପିସ୍ତଲ ସାହାଯ୍ୟରେ ଦୁଇ ବେପାରୀଙ୍କୁ ଆକ୍ରମଣ କରି ଗାଡି ମଧ୍ୟରେ ଥିବା ୧୫ ଲକ୍ଷ ଟଙ୍କା ଲୁଟିନେଇ ଦେବଗଡ଼ ପଟକୁ ଫେରାର ହୋଇ ଯାଇଥିଲେ । ଏହି ଘଟଣା ଜନଗହଳି ପୁର୍ଣ ରାସ୍ତାରେ ଘଟୁଥିବାବେଳେ କିଛି ସ୍ଥାନୀୟ ଲୋକ ଦୁର୍ବୁତ୍ତ ମାନଙ୍କୁ ଅଟକାଇବାକୁ ଚେଷ୍ଟା କରିଥିଲେ ମଧ୍ୟ ବିଫଳ ହୋଇଥଲେ । ଖବର ପାଇ ପାଲଲହଡା ପୁଲିସ ଘଟଣା ସ୍ଥଳରେ ପହଞ୍ଚିବା ସହ ଦୁର୍ବୁତ୍ତ ମାନଙ୍କର ପିଛା କରିଥିଲେ ଏବଂ ଦେବଗଡ଼ ସୀମାନ୍ତରୁ ଜଣେ ସନ୍ଦିଗ୍ଧ ଙ୍କୁ ଧରିବା ସହ ଥାନାରେ ଅଟକ ରଖି ପଚରା ଉଚୁରା ଚଳାଇଛି ।
Advertisement
