ନିଜ ଦେହରେ ପେଟ୍ରୋଲ ଢାଳି ଯୁବକଙ୍କ ଆତ୍ମହତ୍ୟା ଉଦ୍ୟମ

ଛେଣ୍ଡିପଦା – ଅନୁଗୁଳ ଜିଲ୍ଲା ଛେଣ୍ଡିପଦା ଥାନା ପୋଡାପଡା ଗ୍ରାମରେ ଅଭାବନୀୟ ଘଟଣା ଦେଖିବାକୁ ମିଳିଛି । ପାରିବାରିକ କଳହକୁ ନେଇ ପୋଡାପଡା ଗ୍ରାମର ବାପୁଜୀ ସାହୁ ନାମକ ଜଣେ ଯୁବକ ନିଜ ଦେହରେ ପେଟ୍ରୋଲ ଢାଳିବା ସହିତ ଦେହରେ ନିଆଁ ଲଗାଇ ଆତ୍ମହତ୍ୟା ଉଦ୍ୟମ କରିଥିବା ଜଣା ପଡିଛି । ତାଙ୍କୁ ଗୁରୁତର ଅବସ୍ଥାରେ ପରିବାର ଓ ସମ୍ପର୍କିୟ ମାନେ ଛେଣ୍ଡିପଦା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ବାପୁଜୀଙ୍କର ଦେହ ୭୦ ଭାଗ ପୋଡିଯାଇଛି । ଅବସ୍ଥା ସଙ୍କଟାପର୍ଣ୍ଣ ଥିବାରୁ ଡାକ୍ତର ତାଙ୍କୁ ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିଛନ୍ତି । ସୂଚନା ଅନୁସାରେ ଗତ କିଛି ମାସ ପୂର୍ବେ ବଜ୍ରାଘାତରେ ତାଙ୍କ ବାପା ଧୀରେନ ସାହୁଙ୍କର ମୃତ୍ୟୁ ହୋଇଥିଲା । ବାପୁଜୀଙ୍କ ବାପାଙ୍କ ଏହି ମୃତ୍ୟୁ ପାଇଁ ସରକାରୀ ସହାୟତା ମିଳିଛି । ଏହି ସହାୟତା ଟଙ୍କାରୁ କିଛି ଟଙ୍କା ସେ ଘର ଲୋକକୁ ମାଗିଥିଲେ । ପରିବାର ଲୋକ ମନା କରିବାକୁ ସେ କୁଆଡେ ଏଭଳି ଉଦ୍ୟମ କରିଥିବା ଜଣା ପଡିଛି । ତେବେ ଏ ନେଇ ପୁଲିସ ପାଖରେ କୌଣସି ସୂଚନା ନଥିବା ଜଣା ପଡିଛି ।

Advertisement