ପୌରପାଳିକାର କାର୍ଯ୍ୟଶୈଳୀକୁ ନେଇ ଉଠିଲା ପ୍ରଶ୍ନ
ଅନୁଗୋଳ – ସୌନ୍ଦର୍ଯ୍ୟକରଣ ନାଁରେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ। ସହରର ବିଭିନ୍ନ ଛକରେ ମଡେଲ୍, ପୌରାଣିକ କଳାକୃତି ଓ ୱାଟର ଫାଉଣ୍ଟେନ୍ ନିର୍ମାଣ। କିନ୍ତୁ ଏବେ ସେହି ସୌନ୍ଦର୍ଯ୍ୟକରଣ କାମର ଗୁଣବତ୍ତା ଓ ପୌରାଣିକ ବିଷୟବସ୍ତୁର ଚିତ୍ରଣକୁ ନେଇ ଉଠିଛି ବଡ଼ ପ୍ରଶ୍ନ। ଅନୁଗୋଳ ରାଜ ହୋଟେଲ ଛକରେ ପ୍ରାୟ ୫୦ ଲକ୍ଷ ଟଙ୍କା ବ୍ୟୟରେ ନିର୍ମିତ ‘ସମୁଦ୍ର ମନ୍ଥନ’ କଳାକୃତିକୁ ନେଇ ଏବେ ବିବାଦ ଦେଖାଦେଇଛି।
ପୌରାଣିକ କଥାବସ୍ତୁକୁ ଆଧାର କରି ଏଭଳି କଳାକୃତି ନିର୍ମାଣ କରାଯାଇଥିଲେ ମଧ୍ୟ ଏହାର ଚିତ୍ରଣରେ ତଥ୍ୟଗତ ତ୍ରୁଟି ରହିଥିବା ଅଭିଯୋଗ କରିଛନ୍ତି କିଛି ଧାର୍ମିକ ବିଶାରଦ ଓ ସାମାଜିକ କର୍ମୀ।
କ’ଣ ନେଇ ଆପତ୍ତି?
ପୁରାଣର ବର୍ଣ୍ଣନା ଅନୁସାରେ, ଅମୃତ ପାଇବା ପାଇଁ ଦେବତା ଓ ଅସୁରମାନେ ସମୁଦ୍ର ମନ୍ଥନ କରିଥିଲେ। ଏଥିପାଇଁ ମନ୍ଦର ପର୍ବତକୁ ମନ୍ଥନଦଣ୍ଡ ଏବଂ ବାସୁକି ନାଗକୁ ଦଉଡ଼ି ଭାବେ ବ୍ୟବହାର କରାଯାଇଥିବା ବର୍ଣ୍ଣନା ରହିଛି। ମନ୍ଦର ପର୍ବତକୁ ଧାରଣ କରିବା ପାଇଁ ଭଗବାନ ବିଷ୍ଣୁ କୂର୍ମ ଅବତାର ଧାରଣ କରିଥିବା ମଧ୍ୟ ପୁରାଣରେ ବର୍ଣ୍ଣିତ।ମନ୍ଥନରୁ ହଳାହଳ ବିଷ ବାହାରିବା ପରେ ଭଗବାନ ଶିବ ଏହାକୁ ପାନ କରିଥିବା କଥା ମଧ୍ୟ ରହିଛି। ତେବେ ଅନୁଗୋଳ ପୌରପାଳିକା ପକ୍ଷରୁ ନିର୍ମିତ କଳାକୃତିରେ ଭଗବାନ ଶିବଙ୍କୁ ମନ୍ଦର ପର୍ବତ ଉପରେ ଅବସ୍ଥାପିତ କରାଯାଇଥିବାରୁ ଏହା ପୌରାଣିକ ବର୍ଣ୍ଣନା ସହ ସାମଞ୍ଜସ୍ୟ ନୁହେଁ ବୋଲି ଆପତ୍ତି ଉଠିଛି।
ଶ୍ରୀମନ୍ଦିର ପରିଚାଳନା ସମିତିର ସଦସ୍ୟ ମହେଶ ସାହୁ ଏହାକୁ “ଅଶାସ୍ତ୍ରୀୟ” ବୋଲି ଅଭିହିତ କରିବା ସହ କଳାକୃତିର ଚିତ୍ରଣ ଉପରେ ପ୍ରଶ୍ନ ଉଠାଇଛନ୍ତି। ତାଙ୍କ ଅଭିଯୋଗ, ଏଭଳି କାମରେ ଯଦି ତଥ୍ୟଗତ ତ୍ରୁଟି ରହେ, ତେବେ ତାହା ଆଗାମୀ ପିଢ଼ିକୁ ସଠିକ୍ ତଥ୍ୟ ଦେବା ପରିବର୍ତ୍ତେ ଭ୍ରମିତ କରିପାରେ।
‘ନିର୍ମାଣ ପୂର୍ବରୁ ବିଶେଷଜ୍ଞଙ୍କ ପରାମର୍ଶ ନିଆଯାଇଥିଲା କି?’
ସାମାଜିକ କର୍ମୀ ଭବାନୀ ଶଙ୍କର ତ୍ରିପାଠୀଙ୍କ ମତରେ, ପୌରାଣିକ କଥାବସ୍ତୁ ଆଧାରରେ ସର୍ବସାଧାରଣ ସ୍ଥାନରେ କଳାକୃତି ନିର୍ମାଣ କରିବା ପୂର୍ବରୁ ସେ ବିଷୟରେ ଜ୍ଞାନ ଥିବା ବିଶେଷଜ୍ଞଙ୍କ ପରାମର୍ଶ ନିଆଯିବା ଆବଶ୍ୟକ । ସେହିପରି, ଧାର୍ମିକ ପ୍ରତୀକଗୁଡ଼ିକୁ କେବଳ ସୌନ୍ଦର୍ଯ୍ୟକରଣର ଅଂଶ ଭାବେ ବ୍ୟବହାର କରିବା ନେଇ ମଧ୍ୟ ସେ ଆପତ୍ତି ଉଠାଇଛନ୍ତି।
ପ୍ରଶ୍ନରେ ପୌରପାଳିକାର କାର୍ଯ୍ୟଶୈଳୀ
ଏହି ବିବାଦ ପରେ ଏବେ ସବୁଠାରୁ ବଡ଼ ପ୍ରଶ୍ନ—ପ୍ରାୟ ୫୦ ଲକ୍ଷ ଟଙ୍କା ବ୍ୟୟରେ ନିର୍ମିତ ଏହି କଳାକୃତିର ଡିଜାଇନ୍ ଓ ବିଷୟବସ୍ତୁକୁ ଅନୁମୋଦନ କରିବା ପୂର୍ବରୁ କି, ଏହାର ଐତିହାସିକ ଓ ପୌରାଣିକ ସଠିକତା ଯାଞ୍ଚ କରାଯାଇଥିଲା?
କେଉଁ ସଂସ୍ଥା କିମ୍ବା ବିଶେଷଜ୍ଞଙ୍କ ପରାମର୍ଶରେ ଏହି ଡିଜାଇନ୍ ପ୍ରସ୍ତୁତ ହୋଇଥିଲା? ନିର୍ମାଣ ପୂର୍ବରୁ ଏହାର ମାନଚିତ୍ର କିମ୍ବା ଡିଜାଇନ୍ କିଏ ଅନୁମୋଦନ କରିଥିଲେ? ଏବଂ ଏବେ ଯଦି ତ୍ରୁଟି ରହିଥିବା ଅଭିଯୋଗ ଆସୁଛି, ତେବେ ଏହାର ସଂଶୋଧନ କିଏ କରିବ—ଏହି ପ୍ରଶ୍ନଗୁଡ଼ିକର ଉତ୍ତର ଦାବି ହେଉଛି।
ପୂର୍ବରୁ ମଧ୍ୟ ସହରରେ ପ୍ରତିମୂର୍ତ୍ତି ଓ ସୌନ୍ଦର୍ଯ୍ୟକରଣ କାମକୁ ନେଇ ବିଭିନ୍ନ ସମୟରେ ପ୍ରଶ୍ନ ଉଠିଥିବା ଅଭିଯୋଗ ରହିଛି। ଏବେ ‘ସମୁଦ୍ର ମନ୍ଥନ’ କଳାକୃତିକୁ ନେଇ ଉଠିଥିବା ଆପତ୍ତି ପରେ ସରକାରୀ ଅର୍ଥରେ ନିର୍ମାଣ ହେଉଥିବା ସୌନ୍ଦର୍ଯ୍ୟକରଣ କାମରେ ଯୋଜନା, ଡିଜାଇନ୍, ବିଶେଷଜ୍ଞ ପରାମର୍ଶ ଓ ଗୁଣବତ୍ତା ଯାଞ୍ଚ କେତେ ଗୁରୁତ୍ୱ ପାଉଛି, ତାହାକୁ ନେଇ ମଧ୍ୟ ଚର୍ଚ୍ଚା ଆରମ୍ଭ ହୋଇଛି।
ତେବେ ୫୦ ଲକ୍ଷ ଟଙ୍କାର ଏହି କଳାକୃତିକୁ ନେଇ ଉଠିଥିବା ଆପତ୍ତି ଉପରେ ପୌରପାଳିକା କ’ଣ ସ୍ପଷ୍ଟୀକରଣ ଦେବ ଏବଂ ତ୍ରୁଟି ଥିଲେ ତାହାର ସଂଶୋଧନ କିପରି ହେବ—ଏବେ ତାହା ଉପରେ ନଜର।
